تاند (سه شنبه د جدي ۹) د افغانستان د بهرنیو چارو وزارت وايي، د اسلامي نړۍ د فرهنګي میراثونو کمېټې، ایسېسکو د هرات جام منار د اسلامي نړۍ د فرهنګي میراثونو په لېست کې شامل کړ.
ددې وزرات له لوري نن سه شنبه په خپره شوې اعلامیه کې راغلي، ایسېسکو دا پریکړه ستایلې او ویلي یې دي چې جام منار د افغانستان لومړی لرغونی اثر دی چې د اسلامي نړۍ د فرهنګي میراثونو په لېست کې شامل شوی دی.
دغه پرېکړه د اسلامي نړۍ د فرهنګي میراثونو کمېټې په درېیمه فوق العاده ناسته کې د ډیسمبر په لسمه شوې ده.
د یادونې وړ ده چې جام منار تر دې وړاندې په ۲۰۰۲ م کال کې یونېسکو د فرهنګي میراثونو په لېست کې شامل کړی و.