تاند (دوشنبه د جدي ۸) ولسمشر اشرف غني د افغانستان د کرکټ ملي لوبډلې مخکښ ورو توپ اچونکي راشد خان ته د کرکټ د لسیزې غوره لوبغاړي په توګه د ټاکل کېدو مبارکي ورکړه.
د ارګ له لوري په خپره شوې خبرپاڼه کې د ولسمشر غني له قوله راغلي: «په ډېر ویاړ خبر شوم چې د افغانستان د کرېکټ ملي لوبډلې ځوان لوبغاړی او د نړۍ په کچه د کرېکټ منل شوی ستوری راشد خان د کرېکټ د نړیوالې شورا له خوا د لسیزې غوره لوبغاړی ټاکل شوی دی.»
د ښاغلي غني په وینا راشد خان او ده ته ورته ځوانان او پېغلې د نوي افغانستان استازي، د ځوان نسل سرلاري او د تېرو شلو کلونو د لاس ته راوړنو، نویو ارزښتونو، پرمختګونو او غږ پورته کولو ساتونکي دي.
د نوموړي په خبره، دا ځوانان او پېغلې د اوسني افغانستان هغه رسا غږ او تصویر دی چې په نړیوالو سټېجونو د خپل ملت استازیتوب کوي او د ولس رښتینی غږ، قوي اراده، ارزښتونه او ارمانونه له نړیوالو سره شریکوي.
ولسمشر اشرف غني زیاته کړې، دی باور لري چې د افغانستان ځوان نسل به د ټولنې په هره برخه کې خپل ورسپارل شوي مسؤلیتونه په ښه توګه تر سره کوي.
راشد خان د کرکټ نړیوالې شورا په شل اوریزو لوبو کې د تېرې یوې لسیزې تر ټولو غوره لوبغاړو نوملړ کې راغلی دی.
د کرکټ نړیواله شورا تل د هرې لسیزې په پوره کېدو سره غوره لوبغاړي اعلانوي چې دا ځل په کې مخکښ افغان ورو توپ اچونکي راشد خان ځان خپل کړی دی.