تاند(یکشنبه، د جدي ۷) د ملي پخلاینې عالي شورا مشر عبدالله عبدالله وايي، د بین الافغاني مذاکراتو دویم پړاو به هم په ټاکلي وخت په قطر کې پیل شي.
د ملي پخلاینې د عالي شورا د رهبرۍ د غونډې په دویمه ورځ د ټولو غړو په سلا پرېکړه وشوه چې د افغان حکومت او طالبانو ترمنځ به بین الافغاني مذاکرات په ټاکلي وخت په قطر کې پیل شي.
په نننۍ غونډه کې وویل شوه چې د افغانستان مذاکراتي پلاوی له پراخ ملاتړ څخه برخمن دی او دغه راز د هېواد ټول خلک له دغه مذاکراتي پلاوي ملاتړ کوي.
عبدالله عبدالله وایي، که څه هم د مذاکراتو د دویم پړاو لپاره ډېرو نورو هېوادونو هم اماده ګي ښکاره کړې وه خو په وینا یې د کورونا ویروس له کبله به دغه مذاکرات بیا هم په قطر کې کېږي.
دا په داسې حال کې ده چې په قطر کې د افغان حکومت او طالبانو ترمنځ بین الافغاني مذاکرات د جنوري تر ۵مې نېټې پورې وځنډېدل او بېرته به په ټاکلې نېټه پیل شي.