تاند (یکشنبه د جدي ۷) د ولسمشر لومړی مرستیال امرالله صالح د مذاکراتي پلاوي خبرو او تبصرو ته په پام سره وایي، طالبان له نوي افغانستان سره په ګډ ژوند کولو باور نه لري.
ښاغلي صالح دغه څرګندونې د ملي روغې جوړې عالي شورا تر دویمې ناستې وروسته نن یکشنبه کړي دي.
د یادونې وړ ده چې پرون شنبه په کابل کې د ملي روغې جوړې عالي شورا دویمه ناسته وشوه چې د یادې شورا د مشر او امرالله صالح په ګډون په کې ګڼو افغان سیاسیونو برخه اخیستې وه.
امرالله صالح نن یکشنبه پر خپله فېسبوک پاڼه لیکلي: «طالب په نوي افغانستان کې د ټولو ترمنځ پر سوله ائیز او ګډ ژوند عقیده نه لري. د دوحې موافقې طالب ته پر ځان کاذب اعتماد ورکړی دی.»
هغه وايي، د دوحې هوکړه ددې لامل شوې چې طالبان پر خپل نفس کاذب باور ولري، خو زیاتوي چې د ملي دفاع او د کورنیو چارو وزارتونه، د ملي امنیت ریاست او نور دولتي ارګانونه هغه بنسټونه دي چې طالبانو ته د خپلو غلطو محاسبو ښودنه کولی شي.
د ولسمشر لومړي مرستیال وړاندې لیکلي، د سولې خبرې باید مخته لاړې شي تر څو په افغانستان کې د روان بحران لپاره یوه سوله ییزه حل لاره پیدا شي.
ده زیاته کړې، دغه حل لار یوازې د قطر او دوحې څخه نه ده تېره، بلکې د دولت ظرفیت او کاري وړتیا تقویه کول هم د سولې لار رالنډولی شي.
د یادونې وړ ده، چې پرون شنبه په سپېدار ماڼۍ کې د ملي ورغې جوړې عالی شورا دویمه ناسته وشوه او تر ډېره په دې ټینګار وشو چې د بین الافغاني مذاکراتو دویم پړاو باید په خپل ټاکل وخت بېرته پیل شي او د ځای په ټاکنه کې ستونزه راولاړه نه شي.