تاند ( یک شنبه، د جدي ۷) امریکایي رسنیو ویلي چې د دې هېواد چارواکو په نشویل ښارکې د تېرې ورځې چاودنې د عاملینو د نيولو جدي پلټنه پيل کړې ده.
رسنۍ وایي چې امريکایي چارواکو د دې پېښې دعاملينو د نیولو لپاره ۳۵۰ زره امریکايي ډالره جایزه اعلان کړې ده.
بل لورته ځینې راپورونه بیا وایي چې د دې پېښې په تړاو یو کس نیول شوی دی.
تېره جمعه دامريکا تنسي ایالت په مرکز نشویل کې له چاودېدونکو توکو ډک مسافر وړونکي ګاډي ته چاودنه ورکړل شوه.
د دې چاودنې له امله په سیمه کې څو ودانۍ نړېدلې دي.
د معلوماتو له مخې مخابراتي شبکې زیانمنې شوې خو ځاني تلفات یې دومره نه و او یوازې درې کسه په پېښه کې ټپیان دي.
دې چاودنې د درنو مالي زیانونو ترڅنګ هلته مېشت عام خلک هم سخت اندېښمن کړي دي.
دوی له چارواکو د دې پېښې دعاملينو د نيولو غوښتنه کوي خو بل لورته چارواکي هم د عاملینو د نیولو ډاډ ورکوي او په همدې موخه یې نغدي جایزه هم ټاکلې ده.