تاند ( پنج شنبه، د جدي ۴) د اسټراليا بګ باش سوداګریز ليګ په ۱۳ مه لوبه کې اډیلایډ سټرایکرز لوبډلې بريسبین هېټ لوبډلې ته د دوو منډو په توپير ماتې ورکړه.
سټرايکرز سره راشدخان او هېټ لوبډلې سره بیا مجیب لوبېږي.
د دې لوبې په ګټلو سره دا په یاد ليګ کې د راشد اړوند لوبډلې دوهمه بریا ده.
په دې لوبه کې مجيب الرحمن د خپلې لوبډلې لپاره د دوو څلوريزو او یوې شپږيزې په مټ په لسو توپونو ۱۸ منډې تر لاسه کړې خو په توپ اچونه کې د لوبغاړي په سوځولو بریالی نه شو.
مجیب په توپ اچونه کې په څلور اورونو کې ۲۷ منډې ورکړې خو لوبغاړی یې ونه سوځوه.
په مقابل کې بیا راشدخان آرمان د خپلې لوبډلې په ګټه ۹ ناسوځېدلې منډې جوړې کړې.
هغه د منډو ترڅنګ په توپ اچونه کې په ۴ اورونو کې د ۳۰منډو په ورکړه ۲ لوبغاړي هم وسوځول.
په بګ باش ليګ کې د راشد اړوند اډیلايډ سټرایګرز لوبډلې په څلورو لوبو کې یوازي دوه لوبې ګټلې او دوه نور یې بایللي دي.
بل لورته بیا د مجیب اړوند بریسبين هېټ لوبډلې درې لوبې کړې درې واړه يې بایللې دي.