تاند(پنج شنبه،د جدي ۴) ولسمشرغني نن له غرمې مخکې په ولسمشرۍ ماڼۍ کې د افغانستان د روباټيک د ټيم غړو سره کتلي.
له ولسمشرۍ ماڼۍ په خپره شوې خبرپاڼه کې راغلي، په دې کتنه کې چې د هیواد لومړۍ مېرمن هم حضور درلود، لومړی د افغانستان روباتیک ټیم مسوولې مېرمن رویا محبوب د خپلو فعالیتونو او برنامو په اړه خبرې وکړې او د افغانستان روباتیک ټیم څخه د ولسمشر او د هیواد لومړۍ مېرمن د ملاتړ مننه یې وکړه.
مېرمن رویا محبوب ولسمشرغني وړ او د ځوان نسل ملاتړی رهبر وباله او د افغانستان روباتیک ټیم له لوري یې له ۲۴ زره پېچونو څخه جوړ د ولسمشر تصویر هغه ته ډالۍ کړ.
خبرپاڼه لیکي، ولسمشر د خپلو خبرو پر مهال وویل، پخپلو خبرو کې د افغانستان روباتیک ټیم د فعالیتونو او نوښتونو مننه وکړه وې ویل، تاسو د هیواد ځوان نسل یاست چې اوږدمهالی فکر لرئ او دا د هوسا او باثباته افغانستان لپاره ډېر مهم دی.
ولسمشر د افغانستان روباتیک ټیم له ډالۍ څخه په مننې وویل، حکومت به په راتلونکو څو میاشتو کې د افغانستان ډیجیټل کولو لپاره لا زیات فرصتونه برابر کړي او په ځانګړي ډول د طب، پوهنې او سوداګرۍ برخې به په ډیجیټلي سیستم سنبالې شي.
خبرپاڼه کاږې، ولسمشر د خپلو خبرو په پای کې وویل، په نږدې راتلونکي کې یو بین المللي ټیم افغانستان ته راځي او د هیواد د ډیجیټل کولو اړخونه به له نږدې وګوري.