تاند(پنج شنبه، د جدي ۴) کندهار کې امنیتي سرچینې وایي، د دغه ولایت د حج او اوقافو رییس محمد عمر اخندزاده نن سهار په یو وسلهوال برید کې ټپي شوی او موټر چلوونکی یې وژل شوی دی.
د کندهار ولایت امنیه قومندانۍ له رسنیو سره په خبرو کې ویلي، دغه پېښه نن سهار د نهه بجو شاوخوا کې د دغه ولایت دیارلسمې امنیتي حوزې اړوند چوڼۍ سیمه کې رامنځته شوې ده.
سرچینه وایي، په دې پېښه کې د کندهار د حج او اوقافو رییس محمد عمر اخندزاده ټپي شوی او د هغه یو ساتونکی وژل شوی دی.
د دې پېښې مسوولیت تراوسه کومې وسلهوالې ډلې په غاړه نه دی اخیستی.
دا په داسې حال کې دی چې په دې وروستیو کې په کابل او د هېواد په نورو ولایتونو کې هدفي وژني زیاتې شوې دي او هره ورځ د هېواد له ګوټ ګوټ څخه د ځوانانو او مدني فعالانو خبریالانو او نورو کسانو د مرګژوبلې او ټپي کېدو خبرونه راځي.