تاند ( یک شنبه، د قوس ۳۰) ولسمشرمحمد اشرف غني کابل کې د نن ورځې چاودنه غندلې او ویلي یې دي چې په عامو وګړو او عامه ځایونو ترهګریز بریدونه د سولې روان بهیر زیانمنوي.
ولسمشر داسې مهال دا غبرګون ښيي چې نن یکشنبه سهار شاوخوا لس نیمې بجې د کابل ښار د پینځمې امنیتي حوزې اړوند په خوشال خان سیمه کې د ولسي جرګې د غړي خان محمد وردک پرموټرو چاودنه شوې ده.
د کورنیو چارو وزارت وزارت ویلي چې په دې چاودنه کې ۸ تنه وژل شوي او د ولسي جرګې د غړي خان محمد وردک په ګډون ۱۵ تنه نورټپیان دي.
د طارق ارین په خبره په ټپیانو کې ښځې، ماشومان او د ډېر عمر لرونکي کسان هم شامل دي.
د نوموړي په خبره د پېښې په نژدې سیمه کې کورونو او ودانیو ته هم درانه مالي زیانونه اوښتي دي.
تر دې وړاندې ځيني امنیتي سرچینو رسنیو ته په خبرو کې ویلي و چې په دې چاودنه کې ۹ کسان وژل شوي او شپږ نور ټپیان دي.
د کابل سربېره په ننګرهار کې هم نن د پولیسو پر رنجر موټر چاودنې ۳ تنو ته مرګ ژوبله اړولې ده.
امنیتي چارواکي وایي په دې پېښه کې یو پولیس وژل شوی او درې نور ټپيان دي.
تر اوسه د یادو چاودنو مسوولیت کوم چا یا ډلې نه منلی.