تاند ( شنبه، د قوس ۲۹) د پروان د والي ویانده وحیده شهکار وايي نن سهار د پروان په بګرام کې د امریکایي ځواکونو پر یوه ستره نظامي اډه د توغندیو برید شوی دی.
وحيده شهکار د برید د تایید تر څنګ وايي چې تر اوسه د دې پېښې د تلفاتو او احتمالي زیانونو په اړه معلومات نشته دي.
هغه وایي پنځه توغندي د قلندرخېلو له سیمې پر بګرام هوايي ډګر توغول شوي خو په خبره یې ۷ نور توغندي د پولیسو له لوري کشف شوي او خنثی شوي دي.
وحیده شهکار وايي په دې بریدونو کې د سيمې خلکو ته زیان نه دی رسېدلی.
دا لومړی ځل نه دی چې پر دې ډګر توغنديز بریدونه کېږي له دې وړاندې هم هم پر دغه هوايي ډګر د توغندیو بریدونه شوي دي.
د دې برید مسوولیت تراوسه چا نه دی منلی.
بګرام په هېواد کې د امریکایي او نورو بهرنیو ځواکونو تر ټولو ستره نظامي اډه او هوايي ډګر دی چې له دې سیمې خپل ټول ماموریت تنظیموي.