تاند (شنبه، د قوس ۲۹) د کونړ ولایت د کرنې اوبو لګونې او مالدارۍ ریاست مسوولان وایي چې د کونړ د شاتو سږنی تولید څه باندې ۳۳ ټنو ته رسېدلی دی.
د یاد ریاست د رئیس په خبره په دې ولایت کې د شاتو مچیو شاوخوا ۶۳ واړه او لوی فارمونه شته دي.
دوی وایي د یادو فارمونو د شاتو د تولید سږنۍ کچه نږدې ۳۳.۶ ټنو ته رسېدلې ده.
بل لورته په کونړ کې د شاتو تولیدوونکي وایي که د کرنې ریاست ورسره د وسایلو پر وخت مرسته وکړي تولید به یې نور هم ډېر شي.
دوی وایي تولید یې ښه او په ټول هېواد کې مینه وال لري خو د کرنې له ریاست نه ګیله لري او وایي پر وخت ورسره مرسته نه کوي.
خو د کونړ د کرنې رئیس بیا د شاتو تولیدوونکو ته د هر راز مرستې ډاډ ورکوي.