تاند(پنجشنبه، د قوس ۲۷) چینايي ستوربېړۍ بالاخره مځکې ته راستنه شوه او د سپوږمۍ د خاورو او ډبرو نمونې یې راوړې.
دا له ۴۰ کلونو وروسته لومړی ځل دی چې له سپوږمۍ څخه د خاورو او تیږو نمونې مځکې ته راوړل کېږي.
چانګ ۵ ستوربېړۍ تېره شپه د چین په منګولیا کې کښته شوه. پر مځکه د کښېناستو په مهال یې پراشوت پرانیست چې ورو کښېني.
دې ستوربېړۍ په سپوږمۍ کې ۶ فوټه سوری جوړ کړ او ۴ اعشاریه ۴ پونډه خاورې او تیږې یې ټولې او مځکې ته راوړې.
د لومړي ځل لپاره انسان د ۱۹۶۹ د جولای په شلمه پر سپوږمۍ پښه کېښوده او د هماغه کال د جولای په ۲۱ نېټه بېرته راستون شو.
نیل ارمسترانګ د دې سفر په لړ کې ۲۱ ساعته او ۳۶ دقیقې په سپوږمۍ کې تېرې کړې.