تاند (پنجشنبه د قوس ۲۷) د افغانستان د ملي روغې جوړې عالي شورا مشر عبدالله عبدالله وايي، د سولې خبرو دوهم پړاو کې به د اوربند په ګډون پر یو شمېر مهمو او اساسي موضوعاتو بحثونه وشي.
ښاغلي عبدالله چې نن یې په کابل کې د سولې پروسه کې د ښځو د ګډون په اړه یوې جوړې شوې ناستې ته وینا کوله وویل، د سولې پروسه یوې حساسې مرحلې ته رسېدلې ده او افغانان د یوې ښې پایلې په هیله دي.
نوموړي وویل، دوی هیله لري چې دا خبرې په افغانستان کې د یوې تلپاتې سولې د راتلو سبب شي.
هغه زیاته کړه، تر ټولو مهمه د بین الافغاني خبرو پیل و، او اوس چې دغه بهیر پیل شوې ټول افغانان د تاوتریخوالي د کمولو غوښتونکي دي.
دده په وینا افغان حکومت ددې په هیله چې په افغانستان کې به روان تاوتریخوالی پای ته ورسېږي، د طالبانو ۵۰۰۰ بندیان خوشې کړل خو زیاتوي چې د بندیانو خلاصون هېڅ پایله نه ده ورکړې.
د ملي روغې جوړې عالي شورا مشر وايي، د طالب زندانیانو له خلاصون سره سره مقابل لوري تاوتریخوالی لا پسې زیات کړی چې دا چاره هېڅ افغان ته د منلو وړ نه ده.
عبدالله عبدالله د مذاکراتو له لارې د راوان بحران پر پای ته رسېدو ټینګار وکړ او زیاته یې کړه چې دواړه خواوې باید په دې پوه شي چې جګړه او تاوتریخوالی د حل لاره نه ده.
هغه په خپلو خبرو کې دا هم وویل، هڅه کوي څو چې د بین الافغاني مذاکراتو دویم پړاو پیلېږي، د ملي روغې جوړې دویمه ناسته هم تر سره کړي.
دا په داسې حال کې ده چې د افغان حکومت او طالبانو مرکچي ټیمونو د سولې په خبرو کې د درې اونیو د وقفې خبر ورکړی دی.
ټاکل شوې دویم پړاو مذاکرات د راتلونکې جدي میاشتې په ۱۶ بېرته پیل شي، خو دا چې دویم پړاو مذاکرات به چېرته وي تر اوسه یې د ځای په هکله معلومات نه دي ورکړل شوي.
د حکومت د مرکچي ټیم مشر معصوم ستانکزي او غړیو یې په کابل کې له عبدالله عبدالله سره د لیدنې پر مهال وویل چې په نژدې راتلونکې کې به د دویم پړاو مذاکراتو ځای مشخص شي.
طالبانو بیا تر اوسه په دې هکله له خپله طرفه څه نه دي ویلي.
د افغانستان حکومت طالبانو ته وړاندیز کړی چې د هېواد په داخل کې چېرته چې دوی وغواړي افغان دولت به ورته امکانات برابر کړي او خبرو ته به ورسره کېني.
په ورته مهال له قطر څخه بېرته کابل ته د راغلي افغان حکومت د مذاکره کوونکي پلاوي مشر معصوم ستانکزی وايي چې د حکومت له مشرتابه، سیاسي مشرانو او د مدني ټولنو له بیلابیلو قشرونو سره یې د سولې اړوند خپلې سلا مشورې پیل کړي دي او زیاتوي چې دغه مشورې کولی شي په افغانستان کې د سولې راتلو او د جنګ پای لپاره لاره پرانیزي.