تاند (پنج شنبه، دقوس ۲۷) ولسمشرغني نن د یوه لوړپوړي پلاوي په ملتیا کندهار ولایت ته تللی دی.
د راپورونو له مخې هغه به په دې سفر کې د کندهار له ځایي چارواکو، قومي مشرانو ، ځوانانو او بېلابېلو قشرونو له استازو سره لیده کاته ولري.
سرچینې وایي چې نوموړی به د دې تر څنګ د کندهار وضعیت له نږدې وګوري.
ولسمشر داسې مهال کندهار ته سفر کوي چې د دغه ولایت په څو ولسوالیو کې وسله والو طالبانو له څو اونیو راهیسې خونړي بریدونه پيل کړي دي.
د کندهار اوسېدونکي هیله من دي چې د ولسمشر دا سفر به د دوی لپاره د امن سفر وګرځي.
دوی وایي په دې وروستیوکې په دې ولایت کې امنيتي وضعیت خورا داندېښنې وړ دی او په کار ده چې وضعیت کنترول شي.