تاند (سه شنبه د قوس ۲۵) د افغانستان د ملي امنیت پخوانی رئیس رحمت الله نبیل وایي، ددې پر ځای چې زلمي خلیلزاد په روان حساس وخت کې افغانستان ته سفر کړی وی د پینځم ځل لپاره پاکستان ته تللی.
ښاغلي نبیل د دوشنبې په شپه پر خپل ټوېټر لیکلي، زلمی خلیلزاد د پينځم ځل لپاره پاکستان ته تللی او نیوکه کوي چې په دې اساس وخت کې یې باید افغانستان ته هم یو سفر کړی وی.
نوموړي د افغان سولې پروسې ته په اشارې ویلي چې دا سوله د افغانانو لپاره نه ده او نه د افغانانو په مشرۍ مخته ځي، بلکې د افغان جګړې په څېر یوه نیابتي مسئله ده.
Fifth trip to PAK and discussion with PAK Army/ISI about the peace in #AFG, but not a single trip to #AFG during this sensitive time not even for consultation or at least a courtesy visit to Afghanistan. It is not an Afghan owned and Afghan lead peace, it is a "Proxy Peace". https://t.co/UOigCk4Nuv
— Rahmatullah Nabil (@RahmatullahN) December 14, 2020
زلمي خلیلزاد په داسې مهال پاکستان ته سفر کړی او هلته یې له پاکستاني چارواکو سره لیده کاته کړي چې په دوحه کې د افغان حکومت او طالبانو په مذاکراتو کې د درې اونیو لپاره د رخصتۍ خبر ورکړی دی او ټاکل شوې چې نن سه شنبه افغان پلاوی کابل ته ستون شي.
د راپورونو له مخې خلیلزاد په دې سفر کې د پاکستان د استخباراتي ادارې له مشر او د دغه هېواد د پوځ له مشر قمر جاوید باجوه سره پر افغان سوله او مذاکراتو خبرې کړې دي.
نوموړي تېره شپه په څو جلا ټوېټ پیغامونو کې وویل، په افغانستان کې روان وضعیت ته په کتو، د افغانانو ترمنځ د سولې خبرې باید د جنورۍ په پنځمه بېرته پیل شي او هېڅ خنډ پکې رامنځته نه شي.
بلخوا د افغانستان ولسمشر اشرف غني تېره ورځ د کابینې په ناسته کې طالبانو ته وړاندیز وکړ چې د سولې د خبرو بل پړاو دې د افغانستان په داخل کې ترسره شي.
تر ده وړاندې د ملي امنیت سلاکار حمدالله محب هم ورته غوښتنه کړې وه.
د دوی په خبره که طالبان د افغانستان په هره سیمه کې وغواړي، افغان مرکچي پلاوی خبرو ته حاضر دی، خو طالبانو تر اوسه په رسمي توګه په دې هکله خپل دریځ نه دی روښانه کړی.