تاند – تورباز یو هندی فلم دی چې د افغانستان په اړه جوړ شوی دی. په دې فلم کې مرکزي رول د بالیووډ د مشهور سینمايی ستوري سنجې ډت دی او نرګس فخري بیا د دې فلم ښځینه رول په غاړه لري.
دا فلم د دسمبر په یوولسمه نیټفلیکس انترنیټي شبکې خپور کړ.
که څه هم د دې فلم نوم پښتو دی یعني تور باز خو بالیووډ یا د هند سینما په افغانستان کې د کورنیو بې ځایه شویو په یوه کمپ کې د افغان ماشومانو پر ژوند جوړ کړی دی.
نیټفلکس، چې اوس د نړۍ د سینمايي فلمونو او سریالونو د خپرولو یوه لویه شبکه ده، دا فلم د جمعې په ورځ خپور کړ. د دې شبکې فلمونه په درسته نړۍ کې سلګونه ملیونه انسانان ګوري.
دا شبکه د میاشتني فیس په بدل کې مشتریانو ته بې شمېره فلمونه، سریالونه او مستند فلمونه وړاندې کوي.
د هندي رسنیو پر اساس، ګیریش ملک د تورباز فلم پرودیوسر او راهول میترا یې ډایرکتر دی.
په دې فلم کې ښودل کېږي چې طالبان څرنګه په خپلو لیکو کې ماشومان ګوماري او څه ډول د بهرنیو او افغان ځواکونو پر ضد په اتحاري حملو کې له هغو کار اخلي.
په دې فلم کې سنجې دت، چې مرکزي رول په غاړه لري، د دې لپاره کابل ته ځي چې د یوه ماشوم په انتحاري حمله کې یې مېرمن او زوی وژل شوي دي.
سنجې دت په دې فلم کې له پاکستانه د بېرته راستنو شویو کډوالو یوه کمپ ته ځي او هلته یې له کرکټ سره د ماشومانو مینه دې ته هڅوي چې د کمپ له ماشومانو د کرکټ ټیم جوړ کړي.
هندوستان ټایمز ورځپاڼې په یوه کره کتنه کې د دغه فلم په اړه کښلي چې د افغانانو ژوند یې هغسي چې پکار وه، نه دی انځور کړی.
خو څه چې په دغه فلم کې اوڅار او د پام وړ دي هغه د طالبانو له لوري له ماشومانو څخه په جګړه په تېره بیا انتحاري حملو کې استفاده او په افغانستان کې د کرکټ لوبې شهرت دی.