تاند(دوشنبه، د قوس ۲۴) د افغانستان د سولې لپاره د امریکا ځانګړی استازی زلمي خلیلزاد وايي د افغانانو ترمنځ د سولې خبرې باید د جنورۍ په پنځمه بېرته پیل شي.
خلیلزاد پر خپله ټویټرپاڼه دې ته په اشارې چې دواړو مرکچي پلاوو اعلان کړی چې د شلو ورځو لپاره دمه کوي، کښلي«… حتمي ده چې د خبرو په بیا پیلېدو کې ځنډ ونه شي او هغسې چې موافقه شوې ده، باید د جنورۍ په ۵ مه بیا پیل شي.»
۳/۳ – د هغه څه له کبله چې په خطر کې دي، حتمي ده چې د خبرو په بیا-پیلیدو کې ځنډ ونشي او هغسې چې هوکړه شوې ده، باید د جنورۍ پر ۵ بیاپیل شي.
— U.S. Special Representative Zalmay Khalilzad (@US4AfghanPeace) December 14, 2020
ده په عین حال کې ویلي «له بده مرغه، جګړه لا روانه ده. د یوه سیاسي جوړجاړي، اورکم او اوربند لپاره اړتیا لاهم بیړنۍ پاتې ده.»
په همدې حال کې د افغانستان ولسمشر اشرف غني نن طالبانو ته وړاندیز وکړ چې د سولې د خبرو بل پړاو دې د افغانستان په داخل کې ترسره شي.
تر ده وړاندې د ملي امنیت سلاکار حمدالله محب هم ورته غوښتنه کړې وه.
دوی طالبانو ته ویلي چې د افغانستان په هره سیمه کې چې دا ډله یې غواړي، افغان مرکچي پلاوی خبرو ته حاضر دی.
که څه هم طالبانو لا دا غوښتنه رد کړې نه ده خو د دې ډلې پلویانو له دې وړاندیز سره مخالفت کړی دی.