تاند (شنبه د قوس ۲۲) په قطر کې د افغان حکومت او طالبانو مرکچي ټیمونه وايي چې د سولې مذاکرات په رسمي توګه د درې اونیو لپاره وځنډېدل.

د افغان دولت او طالبانو مذاکراتي ټيمونو په یوه مشترکه اعلامیه کې ویلي چې د اجنډا موضوعات زیاتو مشورو ته ضرورت لري او دواړو لوریو توافق وکړ چې د روانې ډسمبر میاشتې له ۱۴مې به د راتلونکي جنورۍ میاشتې تر ۵مې نېټې پورې وقفه وي.

په اعلامیه کې راغلي چې دویم پړاو مذاکرات به د جنورۍ میاشتې په پنځمه بېرته پیلیږي.

د سرچینې په خبره د بین الافغاني مذاکراتو دواړو خواوو د اجنډا د موضوعاتو ابتدایي ليستونه هم سره تبادله کړي او د موضوعاتو په اړه یې لومړني توضیحي بحثونه ترسره کړي.

دوی وايي دواړه لوري د قطر هیواد د دولت او ملت د ميلمه پالنې او لازمو تسهيلاتو برابرولو څخه مننه کوي.

د رسمي خبرو له پیل وروسته د دولت او طالبانو د مرکچي پلاوو له غړو د تماس ډله وټاکل شوه څو د سولې خبرو د اجنډا او نورو غونډو لپاره طرزالعمل نهایي کړي.

پر طرز العمل د خبرو په پيل کې ځيني اختلافات رامنځته شول چې بالاخره تېره اوونۍ دواړو لورو پر ٢١ ماده ييز طرزالعمل موافقه وکړه.

بلخوا د افغانستان د ملي امنیت سلاکار حمدالله محب وړاندیز کوي چې د سولې خبرو پاتې پړاوونه دې د هېواد د ننه ترسره شي او زیاتوي چې د افغانستان حکومت به ورته ټولې اسانتیاورې برابرې کړي.

https://taand.net/%d9%85%d8%ad%d8%a8-%d8%b7%d8%a7%d9%84%d8%a8%d8%a7%d9%86%d9%88-%d8%aa%d9%87-%d9%88%da%93%d8%a7%d9%86%d8%af%db%8c%d8%b2-%da%a9%da%93%db%8c-%da%86%db%90-%d9%be%d8%a7%d8%aa%db%90-%d9%85%d8%b0%d8%a7%da%a9/