تاند (شنبه د قوس ۲۲) پر کابل ښار یو ځل بیا راکېټي برید شوی، عیني شاعدان وایي چې دا توغندي نن سهار په شپږ نیمو بجو د پنځلسمې امنیتي حوزې د لب جر سیمې څخه د ښار پر مرکزي سیمو توغول شوي.
د افغانستان د کورنیو چارو وزارت وايي، د دوی لومړني معلومات ښيي چې نن سهار د کابل خیرخانې لب جر سیمې نه لس توغندي د ښار په نورو سیمو توغول شوي دي.
ددغه وزارت ویاند طارق ارین پر خپل ټوېټر لیکلي، دا توغندي له یوه سراچه ډوله موټر توغول شوي، چې درې یې د هوايي ډګر شاوخوا، پینځه د نهمې امنیتي حوزې اړوند ساحو او یو د نهمې امنیتي حوزې پر زن آباد سیمه لګېدلي دي چې هېڅ ډول زیان نه لري.
ښاغلي ارین زیاته کړې یو بل راکټ د خواجه رواش پر استوګنیځه سیمه لګېدلی چې یو کس پکې وژل شوی او بل ټپي دی.
دا په نژدې یوه میاشت کې دویم ځل دی چې د کابل ښار په مرکزي نقطو توغندیز بریدونه کېږي.
تر اوسه کوم چا یا ډلې ددغه برید مسؤلیت نه دی منلی.
د روانې قوس میاشتې په لومړۍ نېټه هم د کابل ښار پر ځینو برخو توغندي توغول شوي وو، چې اته کسان پکې ووژل شول او ۳۱ نور ټپیان شول.
د یو بل خبر له مخې د کابل ښار د لسمې امنيتي حوزې آمر دويم څارن مسيح الله د عملياتو پر مهال د وسله والو له خوا وژل شوى دى.
د ولسمشر لومړي مرستيال امرالله صالح پر خپله فېسبوک پاڼه لیکلي چې مسيح الله پرون په کابل ښار کې د مجرمينو پر ضد د عملياتو پر مهال وژل شوى دى.
د ښاغلي صالح په خبره چې د مسیح الله قاتل حمید نومېږي، پولیسو د هغه پر کور عمليات کړي، خو هغه له سيمې تښتېدلى و.
د کورنيو چارو وزارت وياند طارق ارين هم د لسمې حوزې د ټولي د امر وژنه تاييد کړې ده.