(جمعه د قوس۲۱) ناروې وايي، سره له دې چې د امریکا د متحدو ایالتونو ولسمشر ډونالډ ټرمپ ویلي چې له افغانستانه خپل ټول پوځیان باسي، دا هیواد به د ناټو د یوه غړي په توګه خپل پوځیان له افغانستانه ونه باسي.
د ناروې (نیوز این انګلیش) ویبپاڼې د خپل هیواد د دفاع وزارت د خبرپاڼې پر اساس وویل چې ناروې په افغانستان کې د ناټو د ماموریت په چوکاټ کې خپل حضور ته دوام ورکوي خو اړتیاوو ته په پام کېدای شي چې د خپل ماموریت او ونډې په څرنګوالي کې بدلون راوړي.
دفاع وزارت دغه راز ویلي چې له ناټو سره یې په دې اړه خبرې روانې دي چې د ټرمپ له اعلانه وروسته به په افغانستان کې د ناټو ځواکونو د حضور په اړه څه پرېکړه وشي.
د ناروې دفاع وزارت ویلي، حتي که د افغانستان له دولت سره د طالبانو د سولې خبرې ښه پرمخ لاړې شي او بریالۍ هم شي بیا هم افغانستان د تروریستي ډلو له خطره خوندي نه دی.
دغه وزارت ویلي، تر څو چې په افغانستان کې جګړه روانه وي د تروریزم خطر له منځه نه ځي.
په افغانستان کې د ناروې ځواکونه د ناټو د غوڅ ملاتړ ماموریت په چوکاټ کې فعالیت کوي. دا هیواد په کابل کې ۱۰۰ پوځیان لري او هر کال له افغانستان سره ۶۰ ملیون ډالره مالي مرسته کوي.