تاند، پنجشنبه، د ثور ۲۵مه: پوهنې وزارت په ټولو ګرمسېر ولایتونو کې د ښوونځیو کلنۍ ازموینې تر امر ثاني پورې وځنډولې.
د پوهنې وزارت ویانده نوریه نزهت تاند ته وايي، چې دا پریکړه د کابینې په غونډه کې شوې او د سردسېرو ولایتونو د ګرمسیرو ولسوالیو ښوونځي هم په دې پریکړه کې شامل دي.
نوموړې وویل، ټاکل شوې وه چې د ګرمسېرو ښوونځیو کلنۍ ازموینې په جوزا کې پیل شي، خو له دې کبله چې له دوه میاشتو راهیسې د کرونا د مخنیوي تدابیرو په اساس ټول ښوونځي تړلي دي، نو ازموینې یې هم وځنډول شوې.
افغانستان کې د کرونا لومړنۍ پېښه د ۱۳۹۸ کال د حوت په پنځمه هرات ولایت کې ثبت شوه خو اوس دا پېښې ۵ زره ۶۳۹ ته رسېدلې دي چې ورسره په هیواد کې د ښارونو، دفترونو او تعلیمي ادارو پرانیستل کېدل په نږدې وخت کې ناممکن ښودل شوي دي.