تاند (دوشنبه د قوس ۱۷) د بامیان ځايي چارواکي وايي، په دغه ولایت کې د وروستي خونړي برید په تړاو پینځم کس هم ونیول شو.
د بامیان د مطبوعاتي دفتره په خپره شوې خبرپاڼه کې راغلي، دغه کس پرون یکشنبې د امنیتي ځواکونو له خوا نیول شوی دی.
د خبرپاڼې د معلوماتو له مخې نیول شوي کس په خپلو لومړنیو اعترافاتو کې منلې چې په بامیان کې یې په وروستي برید کې لاس درلود.
تر اوسه د یادې پېښې په تړاو پینځه تنه نیول شوي، خو د بامیان والي سید انور رحمتي وايي چې څلور هغه یې د لا نورو څېړنو په موخه کابل ته انتقال شوي دي.
د یادونې وړ ده چې د روانې قوس میاشتې په څلورمه ماښام مهال د بامیانو په مرکز کې یوه درنه چاودنه وشوه، چې نژدې ۲۰ تنه په کې ووژل شول او ۶۰ نور ټپیان شول.
تر اوسه د دغې پېښې مسؤلیت کوم چا یا ډلې په غاړه نه دی اخیستي، طالبانو هم په دغه برید کې لاس لرل رد کړي دي.