تاند ( سه شنبه، د قوس ۱۱) د بهرنیو چارو وزیر حنیف اتمر د ایران د بهرنیو چارو له وزیر جواد ظریف سره د سیمې پر روان وضعیت تلیفوني خبرې کړې دي.

د دې خبرو پرمهال ایران یو ځل بیا ژمنه کړې چې د افغانستان د سولې په پروسه کې به هر اړخیزه مرسته کوي.

جواد ظریف په افغانستان کې وروستی تاوتریخوالی د اندېښنې وړ بللی او هیله یې څرګنده کړې چې د سولې روانې خبرې به ژر يوې پایلې ته ورسېږي.

په ورته وخت کې د افغانستان د بهرنیو چارو وزير حنیف اتمر هم په دې تلیفوني اړيکه کې د افغان سولې په تړاو د سیمه ییزې اجماع د پیاوړي کولو په برخه کې د ایران هڅې ستایلي.

ایران داسې مهال په افغان سوله کې خپله ژمنه بیا تازه کوي چې یو شمېر رسنیو په خپلو ليکنو کې د ایران پر نیت شک ښودلی.

عرب نيوز لیکي ایران له ټولو ممکنو لارو هڅه کوي چې په افغانستان کې نفوذ ولري او اوس غواړي واک ته د طالبانو د رسېدو له لارې په دغه هېواد کې د عراق، سوریې او نورو سیمه ییزو هېوادونو په څېر بشپړه مداخله ولري.

https://taand.net/%d8%a7%d9%85%d8%b1%db%8c%da%a9%d8%a7-%d8%a7%db%8c%d8%b1%d8%a7%d9%86-%d9%be%d9%87-%d8%a8%d9%87%d8%b1-%da%a9%db%90-%d8%af-%d8%ae%d9%be%d9%84-%d9%86%d9%81%d9%88%d8%b0-%d9%84%d9%be%d8%a7%d8%b1%d9%87/