تاند (شنبه د قوس ۸) د بامیان والي سید انور رحمتي وایي، امنیتي ځواکونو په دغه ولایت کې د وروستیو بریدونو په تړاو څلور کسان نیولي دي.
ښاغلي رحمتي نن خبریالانو ته وویل، نیول شوي کسان د پنجشېر، سمنګان، کابل او بامیان ولایتونو اوسېدونکي دي او د لا زیاتو څېړنو په موخه کابل ته انتقال شوي دي.
د روانې قوس میاشتې په څلورمه نېټه د بامیان په ښار کې چاودنې وشوې چې ګڼو کسانو ته یې مرګ ژوبله واوړله.
د بامیان د مطبوعاتي دفتر د معلوماتو له مخې په دغو چاودنو کې د دوو سرتېرو په ګډون ۱۷ کسان وژل شوي او ۵۸ نور یې ټپیان کړي دي.