تاند ( شنبه، د قوس ۸) ملي دفاع وزارت وایي چې، د ارزګان په ګیزاب ولسوالۍ کې ۱۸ طالبانو ته مرګ ژوبله اوښتې.
یاد وزارت په یوه خبرپاڼه کې زیاتوي چې طالبانو د ارزګان ولایت د ګیزاب ولسوالۍ اړوند سیمو کې پر حکومتي ځواکونو برید وکړ، چې وروسته د دواړو ډلو تر منځ نښته شوې او پر مهال یې اته طالبان وژل شوي او لس نور ټپیان دي.
سرچینه وايي چې د نښتې پر مهال د طالبانو یو موټر، یو موټرسایکل او یو شمېر وسلې هم د حکومتي ځواکونو لاس ته ورغلي دي.
دفاع وزارت دغه راز د يوه بل خبر له مخې وایي چې، افغان ځواکونو تېره شپه د هرات په کهسان ولسوالۍ کې ۱۵ طالبانو وژلي دي.
سرچینه وایي، په دې نښته کې ۵ طالبان ټپیان شوي هم دي.
بل لورته وسله والوطالبانو د دغې ادعا په اړه کوم غبرګون نه دی ښودلی.