تاند(شنبه، د قوس ۸) د خوست د ځاځي میدان ولسوالۍ اوسیدونکي وايي چې، پاکستاني ځواکونه په سیمه کې د اغزن تار غزولو هڅې کوي، خو ولس ورته اجازه نه ورکوي.
ځايي مشران وايي چې، دا مهال په بېلابېلو سیمو کې تر ۶۰۰ پورې قومي ساتونکي ډیورنډ فرضي کرښې ته څېرمه ځای پر ځای شوي دي.
دوی وايي د قومي پرېکړې له مخې د سیمې هر وګړی اړ دی چې د مقابل لوري تجاوز ته ځواب ورکړي.
د سیمې خلک له حکومت څخه غوښتنه کوي، چې له خپلې خاورې د دفاع په خاطر دوی ته وسلې او مهمات ورته ورکړي.
د خوست امنیتي چارواکي وايي، چې امنیتي ځواکونو هر وخت د جګړو د شدت پر مهال سیمې ته ځانونه رسولي دي.
دا لومړی ځل نه دی چې پاکستان د تاسیساتو د جوړولو هڅه کوي بلکې له دې وړاندې هم څو څو ځله یې په ورته عمل لاس پورې کړی دی.