تاند(جمعه، د عقرب ۳۰) افغان حکومت د استرالیايي ځواکونو لخوا افغانستان کې د ملکي وګړو زورونې په تړاو د راپور خپرول لازم اقدام بللی او زیاته کړې یې ده چې افغان حکومت د استرالیا پر عدلي نظام باور لري.
د ولسمشرۍ ماڼۍ په خبرپاڼه کې راغلي دي، ډاډ شته چې تورن کسان به تر عدلي او قضايي څار لاندې ونیول شي.
په خبر پاڼه کې زیاته شوې، د بین المللي قوانینو پربنسټ د ملکي وګړو د سر خوندیتوب په جنګ کې د ټولو ښکیلو لورو مسوولیت دی.
د استرالیا یو لوړپوړي پوځي چارواکي ویلي ددوی څلور کلونو پلټنو ښودلې ده چې ځینو سرتېرو یې په افغانستان کې په جنګي جنایتونو کې لاس درلود او دوی په دې موده کې د ۳۹ داسې مواردو په کشف بریالي شوي چې په هغه کې استرالیايي ځواکونو ملکي افغانان او زندانیان په قصدي توګه وژلي دي.