تاند(پنجشنبه، د نوومبر۱۹) د ناټو سرمنشي ینس ستولتنبرګ وايي چې په افغانستان کې یې د ناټو د ماموریت په اړه د دغه هیواد له ولسمشر اشرف غني سره خبرې کړي دي.

ستولتنبرګ، چې له افغانستانه د امریکايي پوځیانو د ژر وتلو په اړه د ولسمشر ټرمپ له پرېکړې سره مخالف دی، پر خپله ټویټرپاڼه لیکلي «موږ د افغانستان د سولې د پروسې ملاتړ کوو او د هغې د یو لوري په توګه د خپلو ځواکونو د حضور تنظیمولو ته دوام ورکوو. حتي د امریکا له لوري د ځواکونو له کمولو سره سره، ناټو به د نړیوالو تروریستانو پر ضد په جګړه کې د افغان ځواکونو ملاتړ، روزنې او سلامشورې ته دوام ورکړي.»

ستولتنبرګ د روانې اوونۍ د سې شنبې په ورځ د امریکا د ولسمشر له لوري د ځواکونو د ایستلو په وړاندې خبرداری ورکړ، ویې ویل چې په ناهمږغۍ د ځواکونو د ژر ایستلو تاوان به ښايي خورا لوړ وي

د ناټو له سرمنشي سره د ولسمشر غني د ټېلفوني خبرو په اړه ارګ په یوه خبرپاڼه کې ویلي چې دواړو خواوو په افغانستان کې د ناټو ماموريت او د سولې د پروسې اړه وږغېدل.

ینس سټولټنبرګ وويل، ان په افغانستان کې د امريکايي ځواکونو له کمېدو سره سره به د افغان ځواکونو ملاتړ ته دوام ورکړي.