تاند (چهارشنبه د عقرب ۲۸) د افغانستان په سطحه د پېنګ پانګ د ملي لوبو اتله نرګس فایض وایي چې په کابل کې په ملي سطحه د پېنګ د سیالیو د بیا ګټلو لپاره تمرینات کوي.
نرګس تر دې مخکې هم په کابل کې د افغانستان په سطحه د پېنګ پانګ لوبو سیالۍ ګټلې دي.
نرګس وایي، «زه د دې لپاره تمرین کوم چې په کابل کې د پېنګ پانګ په سیالیو کې برخه واخلم، ښه مقام وګټم او خپل لومړی مقام وساتم.»
اوه کاله کیږي چې نرګس د جوزجان د منتخب ټیم او د پېنګ د ملي ټیم غړې ده.
نوموړې وایي، «ما هم د نورو نجونو په څېر له ماشومتوب څخه له ورزش سره مینه لرله، مور او پلار مې زه تشویق کړم او د استاد مشعل هاشمي په لارښوونه مې ورزش ته مخه کړه.»
ویل کیږي چې نرګس تر اوسه پورې د پېنګ پانګ لوبو د ترسره کولو لپاره پلازمېنې کابل، هرات او مزارشریف ته سفرونه کړي دي.