تاند (دوشنبه د عقرب ۲۶) د ملي دفاع وزارت وايي د کندز دشت ارچي ولسوالۍ ته تازه هوایي او ځمکني کومانډو ځواکونه رسیدلي دي.
د ورستیو راپورونو له مخې اوس هم د دشت ارچي ولسوالۍ په یو شمېر سیمو کې جګړه روانه، خو افغان ځواکونه هڅه کوي چې د طالبانو له لوري نیول شوې سیمې بېرته ونیسي.
تر دې وړاندې داسې راپورونه خپاري شوي و، چې وسله والو طالبانو نن سهار د کندز د دشت ارچي ولسوالۍ بازار نیولی دی.
د رسنیو د راپورونو له مخې طالبانو له پرون سهار راپدېخوا په یاده ولسوالۍ جګړه پیل کړې ده چې افغان ځواکونو د دغې ولسوالۍ دوه کیلومترۍ کې دښتې ته شاتګ کړی دی.
د کندز دوالي ویاند عصمت الله مرادي بیا ویلي، دشت ارچي ولسوالۍ کې د روانې نښتې له امله درې سرتېري او اته طالبان وژل شوي، اته سرتېري او ۱۳ طالبان ټپیان دي.
طالبانو تر اوسه په دې اړه څه نه دي ویلي.