تاند- (دوشنبه، د عقرب ۲۶) کابل ته د پاکستان د صدراعظم عمران خان د سفر په درشل کې د ده تجارتي سلاکار د یکشنبې په ورځ وویل چې د ده تر مشرۍ لاندې به د پاکستان اقتصادي پلاوی افغانستان ته سفر وکړي.
ټاکل شوې ده چې عمران خان او ورسره ملګری پلاوی یې نن (دوشنبه) کابل ته راشي.
د رزاق داوود تر مشرۍ لاندې د پاکستان په سوداګري پلاوي کې به د پاکستان د ګمرکونو او د سوداګرۍ وزارت جګپوړي چارواکي شامل وي.
د پاکستاني رسنیو د راپور له مخې، داوود وویل، د دغه تجارتي پلاوي د سفر هدف د سوداګرۍ او پانګونې د همکارۍ پر نویو برخو د خبرو پیل دی څو د دوو هیوادونو اړیکې لا نژدې شي او افغانستان ته د پاکستان صادرات لا ډېر شي
ده زیاته کړه «له افغان لوري سره به پر دوه اړخیزه سوداګرۍ، ترانزیت او په لا رسمي ډول د دوو هیوادونو ترمنځ د راکړې ورکړې پر لارو چارو خبرې وکړو.»
ده دا هم وویل چې په دې به هم خبرې وکړي چې په څه ډول د دوو هیوادونو ترمنځ د غیررسمي راکړې ورکړې مخه ونیسي یا یې هغه ته رسمي بڼه ورکړي.
ټاکل شوې ده چې عبدالرزاق داوود د افغانستان له ولسمشر اشرف غني سره هم وویني.