تاند ( چهارشنبه، د عقرب ۲۱) د زابل د والي ویاند ګل اسلام سیال وايي، تېره شپه وسله والو طالبانو غوښتل د شینکۍ ولسوالۍ پر ودانۍ د ټونس موټر په واسطه موټربم برید وکړي.
د سیال په خبره ياد موټر د افغان ځواکونو له لورې پېژندل شوی او موخې ته تر رسېدو وړاندې یې چاودنه کړې.
نوموړی وایي په چاودنه کې افغان ځواکونو ته زیان نه دی رسېدلی.
د زابل د والي ویاند زیاتوي، تر چاودنې وروسته لسګونو وسله والو پر ولسوالۍ برید وکړ او د افغان ځواکونو په غبرګون کې ۲۱ وسله وال طالبان ووژل شول ۱۱ نور ټپيان شول.
هغه وايي، د جګړې په سيمه کې د وژل شویو وسله والو جسدونه او وسلې هم پاتې شوي دي.
بل لورته طالب وسله والو تر اوسه په دې اړه څه نه دي ویلي.