تاند (شنبه، د عقرب ۱۷) د افغانستان ملي دفاع وزارت مسولان وایي چې، امنیتي ملي ځواکونو د کندهار ولایت په ارغنداب ولسوالۍ کې د عملیاتو په دوام، نن دغه ولسوالي په بشپړه توګه د تروریستانو له شتونه پاکه کړه.
یاد وزارت په یوه خبرپاڼه کې وایي چې، افغان ځواکونو په دې عملیاتو کې د طالبانو زیات بریدونه دفع او ناکامه کړل.
سرچینه کاږي چې،د دې عملیاتو پرمهال څه باندې دوه سوه طالبان وژل شوي او ۱۰۶ تنه نور یې ټپیان شوي دي.
سرچینه زیاتوي چې، دغه راز امنیتي ځواکونو په دې عملیاتو په زیات شمېر درنې او سپکې وسلې هم ترلاسه کړي
دفاع وزارت په خبرپاڼه کې وایي چې، اوس مهال په ارغنداب ولسوالۍ کې وضعیت عادي حالت ته راګرځېدلی او کنټرول د افغان ځواکونو په لاس کې دی.
خو بل لورته وسله والو طالبانو تر اوسه په دې تړاو څه نه دي ویلي.