تاند ( پنج شنبه، د عقرب ۱) په کندهار ولایت کې د ماین چاودنې له امله ۲ رومانیایي سرتېري ټپيان شوي دي.
د رومانیا دفاع وزارت د دغه خبر د پخلي تر څنګ ویلي چې دا سرتېري په کندهار کې د دوی د مسوولیت په ساحه کې د ځای پر ځای شويو چاودېدونکو توکو د چاودنې په پایله کې ټپیان شوي دي.
سرچینه وایي، پېښه په داسې حال کې رامنځته شوې، چې یاد سرتېري پر ګزمه بوخت وو.
د ټپي شویو سرتېرو روغتیایي وضعیت ښه بلل شوی او تر اوسه د یادې چاودنې پړه کومې وسله والې ډلې پر غاړه نه ده اخیستې.
دا په دوحه کې د امریکا او طالبانو تر هوکړې وروسته لومړی ځل دی چې په افغانستان کې بهرني سرتېري له ورته پېښې سره مخ کېږي.