تاند ( پنج شنبه، د عقرب ۱) د هرات ولایت د برېښنا ریاست په یوه خبرپاڼه کې ویلي، چې تېره شپه د غوریان ولسوالۍ کلاته غازي سیمه کې ناپېژانده کسانو د برېښنا يوه پایه له منځه وړې ده.
خبرپاڼه کاږي، چې د همدې پایې د تخریب له امله د هرات پنځوس سلنه وارداتي برېښنا پرې شوې ده.
چارواکي وایي هڅه کوي چې له امنیتي ارګانونو سره په همغږۍ سیمې ته د برېښنا ریاست د کارکوونکو یوه ډله ولېږي او ویجاړه شوې پایه بیرته له سره ورغوي.
ځايي خلک هم د برېښنا له نشت نه شکایت لري او وایي ډېر کله د دوی برېښنا د نامعلوم دلیل له امله پرې کېږي.
د هرات اوسېدونکی شېرعلي تاند ته وویل، که حکومت د امنیت غمه ونه کړي او پر هغه لاره چې پایې راتېرې شوي امنیتي پوستې ځای پرځای نه کړي ښايي بیا ورته ستونزه رامنځته شي.
د یادونې ده چې د افغانستان په ډیری ولایتونو کې ورته ستونزې موجودې دي او وخت ناوخته وسله وال کسان د برېښنا پایې د نا معلوم دلیل له امله تخریبوي.