تاند(چهارشنبه، د میزان ۳۰) په لښکرګاه کې د وروستیو جګړو له امله بېځایه او زیانمنې شوې کورنۍ د مرستو غوښتنه کوي.
د لښکرګاه ځايي اوسېدونکي وایي چې طالب او حکومت دواړه پر عامو وګړو ظلمونه کوي او د جګړې ستره بیه ملکي وګړي پرې کوي.
د دوی په خبره په تېرو څو ورځنیو جګړو کې د لسګونه هلمندیانو کورونه ویجاړ شوي دي، له کورونو بېځایه شوي دي او بېړنیو مرستو ته اړتیا لري.
دوی له حکومت او طالبانو غوښتنه کوي چې پر ملکي وګړو تپل شوې جګړه دې نور پای ته ورسوي.
تر دې وړاندې هم نړیوالو بنسټونو ویلي وو چې په لښکرګاه کې خونړۍ جګړې تر ټولو ستر زیان ملکي وګړو ته اړولی دی.
د معلوماتو له مخې تر ۴۵ زره پورې کسان په لښکرګاه ښار کې ددغه وحشتناکو جګړو له امله بېځایه شوي وو.