تاند- اپل کمپنۍ د کورونا ویروس د نه خپرېدو له کبله په انلاین مراسمو کې د خپل ایفون ۱۲ څلور ورژنه وښودل.
دا ایفونونه، پر 5G ټکنالوژۍ سربېره لا پرمختللې کمرې لري.
د اسوشیتید پریس خبري اژانس د راپور له مخې، د دغو موبایلونو بیې د ۷۰۰ تر ۱۱۰۰ ډالرو ترمنځ ټاکل شوې دي.
د هغه ایفون ۱۲، چې شیشه یا سکرین یې ۶ اعشاریه ۱ اینچ دی، بیه ۸۰۰ ده خو د ۵ اعشاریه ۴ اینچه ایفون بیه ۷۰۰ په پام کې نیول شوې ده.
د ایفون ۱۲ قیمتي ماډلونه، چې ایفون ۱۲ پرو او ایفون پرو مکس نومېږي، غښتلې کمرې لري او د سکرین اندازه یې ۶ اعشاریه ۷ اینچه ده. له همدې کبله د یوه بیه زر ډالره او د بل یوولس سوه ډالره ټاکل شوې ده.
اپل کمپنۍ ادعا کوي چې دا موبایلونه یې تر پخوانیو کلک دی.
ویل کېږي چې د دغو موبایلونو کونجونه ګردي او د آی پډ پرو په شان دي.
همداراز ایفون دوولس د سرامیک پوښ لري چې د موبل د شیشو یا سکرینونو لپاره په بازار کې تر موجودو ټولو محافظتي پوښونو او شیشو کلک دی.