تاند (شنبه د میزان ۱۹) د اذربایجان او ارمنستان ترمنځ د اوربند له ټینګیدو وروسته اوس دواړو خواووې یو پر بل د اوربند د نقض کېدو تورونه پورې کوي.
د ارمنستان د دفاع وزارت پر مقابل لوري تور لګولی چې د اوربند له ټینګېدو څو ساعته وروسته یې د نګورنو قره باغ سیمه کې عملیات کړي دي.
په ورته مهال اذربایجان هم ویلي چې ارمنستاني ځواکونو د نګورنو قره باغ له لانجمنې سیمې د دوی خاوره بمبار کړې ده.
د راپورونو له مخې دواړو هیوادونو تیره شپه شاوخوا دولس بجې د روسیې په منځګړتوب تر اوربند کولو څو ساعته وروسته تازه بريدونه کړي دي.
د اوربند کولو دغه هوکړه روسیې ته د دواړو هیوادونو د بهرنیو چارو وزیرانو له سفر وروسته شوې چې په جګړه کې د وژل شویو کسانو په تبادله هم سلا شوې وه.
دغه اوربند د روسيې د بهرنيو چارو وزير سرګي لاوروف په منځګړتوب له لس ساعته خبرو اترو وروسته رامنځ ته شوی و.
باید وویل شي چې د آذربایجان او ارمنستان تر منځ د نګورنو قره باغ په نوم سیمه کې د جګړې له پیلېدو راپدېخوا سلګونه کورونه او وسایط له منځه تللي او څه باندې ۴۰۰ کسان پکې وژل شوي دي.