تاند(پنج شنبه، د میزان ۱۷) د غزني ولايت يو شمېر زدهکوونکي او اوسېدونکي په دغه ولايت کې د ښوونيزو امکاناتو په ځانګړي ډول ښوونځيو کې د کتابونو له نه درلودلو سر ټکوي.
دوی د بېلګې په ډول د غزني ولايت د رسنې ښوونځي يادونه کوي، چې يوه ټولګي کې يې ۹۵ زدهکوونکي يوازې يو د رياضي کتاب لري.
د دغه ولايت اوسېدونکي زاهد صمدزي رسنیو ته وویل، د دغه ولایت زده کوونکي په ښوونځيو کې د ښوونيزو امکاناتو له جدي کموالي سره مخ دي او نه شي کولای خپلې زدهکړې په ښه ډول پر مخ يوسي.
نوموړي زیاته کړې:
د غزني ولایت د ګیلان ولسوالۍ په ښوونځیو کې له لومړي تر نهم ټولګي پوري زدهکوونکي د کتابونو له نشتوالي سره لاس او ګریوان دي او په هر ټولګي کې ډېره کمه کچه کتابونه شتون لري.
د نوموړي په خبره، حتا د ګیلان د رسنې ښوونځي کې د یو ټولګي ۹۵ زده کوونکي یو د ریاضي کتاب لري.
هغه زیاته کړه، په دغه ولسوالۍ کې ډېری ښوونځي ودانۍ نه لري او زده کوونکي تر شنه اسمان لاندې په زده کړو بوخت دي.
بلخوا د غزني د پوهنې رئیس محب انصار له رسنیو سره په خبرو کې دغه ستونزه تائید کړه او ويې ویل، دوی ته د پوهنې وزارت له خوا د اړتیا وړ کتابونه په واک کې نه دې ورکړل شوي او په خبره یې له همدې کبله د غزني ښوونځیو زدهکوونکي د کتابونو له کمښت سره مخ دي.
نوموړي زياته کړه:
په غزني ولایت کې څلور لکه او شپږ زره زده کوونکي په زدهکړو بوخت دي چې درېيو میلیونو کتابونو ته اړتیا لري، په داسې حال کې چې د پوهنې وزارت سږ کال موږ ته یوازې شپږ لکه کتابونه په واک کې راکړي دي.
د انصار په خبره، په غزني ولایت کې ۲۸۹ ښوونځي ودانۍ نه لري، خو د یوې موسسي له لوري ورسره د ۱۱۳ ښوونځيو د جوړېدو هوکړه شوې اما د وسلهوالو طالبانو د مخالفتونو له کبله نه شي کولای چې د دې ښوونځیو ودانۍ جوړې کړي.
انصار دغه راز د ښوونکو د کمښت خبره هم وکړه او ويې ویل، دوی د ۴۴۰۰ ښوونکو له کمښت سره مخ دي او کوم ښوونکي چې شتون لري، ډېری یې پخوا د اړيکو په بنسټ په دندو ګومارل شوي دي او د دې وړتیا نه لري چې زدهکوونکي په ښه ډول وروزي.