تاند (دوشنبه د میزان ۱۴) جرمني ویلي په راتلونکي ډسمبر میاشت کې له افغانستان څخه د خپلو سرتېرو ایستلو بهیر پیلوي.
دغه هېواد په داسې حال کې له افغانستان څخه د خپلو ځواکونو د ایستلو ویلي چې امریکا تر راتلونکې یوې میاشتې پورې افغانستان کې د خپلو سرتېرو د کمولو خبر ورکړی دی.
د جرمني رسنیو د راپورونو له مخې، دغه هېواد د لوجیستیکي چارو د سمبالولو لپاره ۱۰۰ کارپوهان افغانستان ته لېږلي دي.
په همدې حال کې د فنلنډ د دفاع وزیر انټي کایکونن سین هم ویلي چې په افغانستان کې د نړیوالو ځواکونو عملیات پای ته رسېدونکي دي او زیاته کړې یې ده چې دوی به د راتلونکي ۲۰۲۱ کال په پسرلي کې له افغانستان څخه خپل ټول شپېته سرتېري بېرته خپل هېواد ته ستانه کړي.
نوموړي د سولې خبرو ته په اشارې ویلي، سره ددې چې په افغانستان کې امنیتي وضعیت ښه نه دی خو په وینا یې هیله مندي شته.
د امریکا او طالبانو ترمنځ په دوحه کې د شوې هوکړې له مخې ټاکل شوې امریکایي پوځیان د ۲۰۲۱ میلادي کال تر مۍ میاشتې په بشپړه توګه له افغانستان څخه ووځي.