تاند- د پایپر میلبو په نوم په هایدروجن چلېدونکې الوتکه د بریتانیا له کرانفبلډ څخه والوته او بېرته په هماغه ځای کې کښېناسته. الوتکه له مځکې ۱۰۰۰ فوټه لوړه شوه او په ساعت کې یې ۱۱۵ مایله سرعت واخیست.
دا الوتکه زیرو اویا کمپنۍ د لندن د شمال په کرانفیلډ کې جوړه کړې ده.
زیرواویا (ZeroAvia) کمپنۍ غواړي چې په راتلونکې کې دا ډول ډېرې هایبریډ الوتکې جوړې کړي. دا الوتکې د تېلو په ځای د هایدروجن په سوځولو او بیټرۍ کار کوي.
تمه کېږي چې دا ډول لویې الوتکې جوړې شي چې ډېر بار او سپرلۍ یووړلی شي.
د بریتانیا حکومت د دې الوتکې د جوړولو مالي لګښت په غاړه اخیستی دی او ټاکل شوې ده چې په راتلونکو درو کلونو کې دا ډول ګڼې الوتکې جوړې شي چې له لسو تر شلو سپرلۍ پکې ځاییږي.
د الوتکې جوړوونکې کمپنۍ وايي چې تر ۲۰۳۰ پورې به په دې بریالي شي چې داسې هایدروجني الوتکې جوړې کړي چې ۲۰۰ تنه سپرلۍ وړلی او تر ۵۵۵۶ کیلومترو پورې سفر کولی شي.
په کرانفیلډ کې تازه ازمویل شوې الوتکه د ۶ تنو لپاره ده او ټاکل شوې ده چې په بل ازمېښت کې له انګلنډ څخه تر سکاټلنډ پورې ۴۰۰ کیلومتره مزل وکړي.
د دې الوتکې ږغ ډېر ټیټ دی او چاپېریال نه ککړوي.