تاند(دوشنبه، د سنبلې ۷) د افغانستان د ملي مصالحې د عالي شورا رييس عبدالله عبدالله نن په درې ورځیني سفر پاکستان ته ځي.

د پاکستان د بهرنیو چارو وزارت پرون په یوه خبرپاڼه کې وویل چې له عبدالله سره به په دې سفر کې د ملي مصالحې د عالي شورا یو شمېر غړي هم ملګري وي.

دا له کله چې عبدالله د ملي مصالحې د عالي شورا رييس ټاکل شوی دی، پاکستان ته د نوموړي لومړنی سفر دی. عبدالله د ملي یووالي د حکومت په مهال هم، چې اجراییه رييس و، پاکستان ته نه و تللی.

عبدالله به د پاکستان د درې ورځیني سفر په لړ کې د پاکستان له ولسمشر عارف علوي او صدراعظم عمران خان سره وویني.

دغه راز په پام کې ده چې د پاکستان د ملي جرګې رييس اسد قیصر او د باندنیو چارو وزیر شاه محمود قریشي ورسره وویني.

ښاغلی عبدالله به د اسلام اباد د ستراتیژیکو مطالعاتو انستیتیوت ته د وینا ترڅنګ له خبریالانو سره مرکې وکړي.

د پاکستان د بهرنیو چارو وزارت وايي چې د عبدالله سفر به د افغانستان پر سوله د دواړو خواوو د نظرونو د تبادلې او د دوو هیوادونو د دوه اړخیزو اړیکو د پراختیا فرصت برابر کړي.

ځینې ناتایید شوي راپورونه وايي چې عبدالله ته داسې اشارې ورکړل شوي چې ګنې پاکستان د طالبانو او حکومت د جوړجاړي په صورت کې د ده په مشرۍ د یوه حکومت له جوړېدو سره موافق دی.