تاند ( شنبه، د میزان ۳) د اوکراین د هوايي چلند اداره وايي په دې هېواد کې د یوې پوځي الوتکې لوېدو په پېښه کې ۲۲ کسان مړه شوي دي.
یاده ادازه زیاتوي، چې دا انتونوف ۲۶ ډوله الوتکه تېره ورځ د اوکراین په خارکوف سیمه کې لوېدلې ده.
د اوکراین د هوايي چلند ادارې په خبره الوتکې ۲۸ سپرلۍ لرلې خو تر اوسه ۲۲ مړي او دوه ټپي کسان موندل شوي دي.
دې ادارې ویلي چې د څلورو نورو کسانو د موندلو هڅې هم روانې دي.
په ورته مهال د اوکراین د کورنیو چارو وزارت وايي، چې د ژغورنې ډلې د الوتکې له لوېدو سمدستي وروسته سیمې ته ورسېدلې او عملیات یې پیل کړي دي.