تاند(پنج شنبه، د سنبلې ۲۷) د ملي دفاع، کورنیو چارو وزیرانو او په افغانستان کې د غوڅ ملاتړ قومندان د لغمان ولایت د امنیتي ارزونې سربېره د دې ولایت له ملکي او نظامي مسوولانو سره د بېلا بېلو موضوعاتو په اړه ګډه ناسته وکړه.
د لغمان والي رحمت الله یارمل د ملي دفاع، کورنیو چارو وزیرانو او د غوڅ ملاتړ له قومندان څخه د مننې ترڅنګ د دې ولایت د ملکي او امنیتي وضعیت په اړه معلومات شریک کړل.
د ملي دفاع وزیر اسدالله خالد له رسنیو سره په خبرو کې وویل چې لغمان ته یې د سفر موخه د دې ولایت د مرکز او ولسوالیو د امنیتي وضعیت پر ارزونې سربېره د وروستیو امنیتي اقداماتو او د دې ولایت له ملکي او نظامي مسوولینو سره پر لا چمتووالي خبرې وې.
هغه وویل، په قطر کې د سولې روانو خبرو ته تمه لري چې تاوتریخوالی به کم او اوربند ته لاره هواره شي او د افغان حکومت اساسي غوښتنه هم د اوربند کول دي.
د ملي دفاع وزیر ډاډ ورکړ چې د لغمان د مرکز او ولسوالیو په کچه به امنیتي ساحه لا پرخه او د دښمن د هر ډول شومو موخو مخنیوی به وکړي.
په افغانستان کې د غوڅ ملاتړ قومندان جنرال سکاټ مېلر وویل، چې لغمان ته یې د سفر موخه د ملي دفاع او کورنیو چارو وزیرانو سره یوځای د دې ولایت امنیتي ارزونه وه چې پرمهال یې په بېلا بېلو موضوعاتو خبرې وکړې.
سکاټ مېلر زیاته کړه چې په قطر کې د افغانانو ترمنځ دسولې روانې خبرې له نږدې څاري او تمه ده چې ښه پایله ولري.
نوموړي افغان ځواکونه د سیمې په کچه قوي ځواک یاد کړ چې کولای شي د خپلې خاورې او ولس ښه ساتنه وکړي او نړیواله ټولنه ورسره د ترهګرۍ پروړاندې مبارزه کې همکاره ده.
په ورته مهال د کورنیو چارو وزیر مسعود اندرابي له رسنیو سره په خبرو کې وویل، چې د مهترلام ښار لا ډاډمن امنیت په موخه د پولیسو د حوزو کارونه نهایي شوي او ژر به عملاً کارونه پیل کړي.
نوموړي وویل، د لغمان پولیسو ته یې هدایت کړی چې د ښار د امنیت سربېره د ولسوالیو امنیت او امنیتي کمبربندونو پراخوالي ته هڅې جدي کړي.
د کورنیو چارو وزیر د لغمان پولیسو لا تجهیز او د هر اړخیزې پاملرنې ډاډ ورکړ
دوی داسې مهال لغمان ته سفر کوي چې په قطر کې د سولې خبرې روانې دي خو بل لورته د ولایتونو امنیتي وضعیت ورځ تر بلې په خرابیدو دی.