تاند، پنجشنبه د سنبلې ۲۷مه: د نیمروز سیمه ییز چارواکي وايي یوه کس په دغه ولایت کې خپله خور او خپل کم عمره خوریی په ډزو وژلي دي.
د نیمروز د والي ویاند بهرام حقمل وايي، چې دغه پېښه نن سهار ددغه ولایت د چهاربرجک ولسوالۍ اړوند میرآباد ساحه کې رامنځته شوې ده.
هغه زیاته کړې امنیتي ځواکونو تورن کس نیولی دی چې اوسمهال ترې څېړنې دوام لري.
د ښاغلي حقمل په خبره دا پېښه د کورني تاوتریخوالي له امله رامنځته شوې ده.
دا په داسې حال کې ده چې تېره ورځ ددغه ولایت په مرکز زرنج ښار کې هم یوه کس خپله مېرمنه په ډزو ووژله او د خپلې لور په ګډون یې دوه کسان نور ټپیان کړل.
د یادونې وړ ده چې په دې وروستیو کې د هدفي وژنو سربېره په هېواد کې د کورني تاوتریخوالي پېښې هم زیاتې شوي چې ډېر کله خبره په قتل تمامېږي.