تاند ( دوشنبه، د سنبلې ۲۴) د افغانستان د عامې روغتیا وزارت د هېواد په ۲۰ ولایتونو کې د ماشومانو د فلج یا پولیو پر وړاندې د واکسین کمپاین پیل کړ.
د یاد وزارت مسولان زیاتوي، چې په دې کمپاین کې به پر څه باندې ۶ میلیونو تر پنځوکلونو کم عمره افغان ماشومانو واکسین تطبيق شي.
د پولیو ضد کمپاین د کورونا ویروس د خپرېدو له کبله د څو میاشتو لپاره ځنډېدلی و، چې له امله یې د پولیو تر څلوېښتو ډېرې مثبتې پېښې ثبت شوي او د پېښو د لا ډېرېدو وېره یې پارولې ده.
د عامې روغتیا وزارت وایي، چې دا کمپاین به د افغانستان په ختیځو، لوېدیځو، جنوبي، مرکزي او شمال ختیځو ولایتونو کې د څلورو ورځو لپاره دوام کوي.