تاند، شنبه د سنبلې ۲۲مه: د افغان دولت او طالبانو تر منځ د سولې خبرې نن د قطر په پلازمېنه دوحه کې پیل کېږي، چې په همدې خاطر د حکومت مرکچي پلاوی له طالبانو سره د خبرو لپاره تېره شپه دوحې ته ورسېد.
دواړه لوري به نن د قطر هېواد په یوه مشهور هوټل شریتون کې د بین الافغاني مذاکراتو د پیل په مراسمو کې ګډون وکړي.
د ملي روغې جوړې عالي شورا رئیس عبدالله عبدالله پرون د حامد کرزي نړیوال هوايي ډګر کې خبریالانو سره په خبرو کې وویل، چې قطر ته د سولې له هیلو سره ځي او اوربند به یې د خبرو په اجنډا کې لومړنی او مهم بحث وي.
هغه زیاته کړه تمه لري چې د سولې په خبرو کې به پرمختګ وشي.
په ورته مهال د بهرنیو چارو سرپرست حنیف اتمر وايي، دا معلومه نه ده چې د افغانانو تر منځ خبرې په څومره وخت ونیسي.
له طالبانو سره د بین الافغاني مذاکراتو د پیل مراسم نن د افغانستان په وخت د ورځې په ۱۰:۳۰ بجو پیل کېږي چې د قطر د بهرنیو چارو وزیر به یې پرانیزي.
ټاکل شوې د پرانیستې مراسمو کې د ملي روغې جوړې عالي شورا رئیس عبدالله عبدالله خبرې وکړي او تر هغه وروسته د غونډې په څنډه کې د کوربه هېواد له یو شمېر مشرانو سره وګوري.
د طالبانو له اړخه به ملاعبدالغني برادر د پیل وینا وکړي.
د امریکا د بهرنیو چارو وزیر مایک پمپیو هم په دغو مراسمو کې د ګډون لپاره قطر ته رسېدلی دی.
ګڼ شمېر افغانان د حکومت او طالبانو تر منځ مخامخ خبرو ته خوشبین دي او له دواړو خواوو څخه د روانې ۴۰ کلنې جکړې د پای ته رسېدو او دایمي اوربند غوښتنه کوي.