تاند(جمعه، د سنبلې ۲۱) د ننګرهار شیرزادو ولسوالۍ کې په ګندمک سیمه کې د وسله والو طالبانو ډله ییز برید د بهرنیانو په ګډون ۱۲ وسله والو طالبانو په وژل کېدو له ماتې سره مخ شو.
د ننګرهار د والي ویاند عطالله خوږیاڼي ویلې چې د شیرزادو ولسوالۍ په ګندمک سیمه کې تېره شپه ناوخته وسله والو طالبانو د امنیتي ځواکونو په پوستو ډله ییز برید وکړ چې د امنیتي ځواکونو په ځوابیه برید کې د بهرني اتباعو په ګډون ۱۲ وسله وال طالبان ووژل شول او لسګونه نور ټپيان شول،متاسفانه په دې پېښه کې د ملي اردو شپږ سرتېرو په ګډون لس امنیتي ځواکونه شهیدان شوي او پنځه نور ټپیان دي .
نوموړي ویلې، د یادې پېښې د رامنځته کېدو سره سم تازه دمې امنیتي ځواکونه سیمې ته رسیدلي او د امنیت په تامین سره یې خلکو ته به عادي ډول د ژوند کولو زمینه برابره کړې ده.
د خوږیاڼي په خبره چې، په ولسي او سیاسي چارو کې د ولسمشر ستر سلاکار او د ننګرهار والي ضیاالحق امرخېل د سولې په حساس پړاو کې رامنځته شوې پېښه غندلې، شهیدو سرتېرو ته یې د فردوس جنت او ټپيانو ته یې د بېړنۍ روغتیا هیله کړې.
بل خوا په خوست کې هم ۲۲ طالبان وژل شوي.
د خوست ولایت د پولیسو ویاند عادل حیدري رسنیو ته وویل چې تیره شپه د خوست ولایت د قلندري ولسوالۍ اړوند د غلنګ په سیمه کې په دوو پوستو طالبانو بریدونه کړې دي چې له امله یې ۲۲ طالبان وژل شوي.
بل لورته په لوګر ولایت کې هم ۱۲ طالبان وژل شوي.
د لغمان ولایت د والي ویاند په علیشنګ ولسوالۍ کې د بریدونو له امله د لسو طالبانو د مرګ ژوبلې خبر ورکړی چې ۶ طالبان مړه دي او څلور نور ټپیان دي.