تاند ( جمعه، د سنبلې ۲۱) په خوست ولایت کې د واده پر مراسمو موټر سايکل بم چاودنه شوې ده.
د خوست د امنيې قوماندانۍ وياند عادل حيدر وایي، چې د دې چاودنې له امله ۱۲ تنو ته مرګ ژوبله اوښتې ده.
نوموړی وایي، دغه پېښه تېره شپه لس نيمې بجې د دغه ولايت مرکز اړوند د کونډيو په سترکلي کې شوې ده.
حيدر زیاتوي، چې چاودنه د واده د هغو ګډونوالو په منځ کې شوې، چې د محلي سندرغاړو کنسرت ته راټول شوي وو.
هغه زیاته کړه چاودنه کې څلور تنه وژل شوي او اته نور ټپيان دي، چې ټول ملکیان دي.
د حيدر په وينا، دغه واده د ملي اردو د يوه چارواکي و، چې هغوی ته په کې کوم زيان نه دی رسیدلی.
په ورته مهال د خوست د ملکي روغتون رییس ډاکټرسيد انور رسنیو ته ویلي، چې دوی ته د پېښې له ځايه څلور جسدونه او دوه ټپيان ور وړل شوي دي.
د دې چاودنې مسؤلیت تراوسه چا پر غاړه نه دی اخیستی.