تاند ( پنج شنبه، د سنبلې ۲۰) ملګري ملتونه په یوه خبرپاڼه کې وایي، چې د میانمار په راخین سیمه کې اوس هم له مسلمانانو غلطه ګټه اخيستل کیږي.
یاد سازمان زیاته کړې، چې اوس هم په یاده سيمه کې مېشت مسلمانان د امنیتي ځواکونو له لوري ځورول کېږي او وژل کېږي.
د ملګرو ملتونو د سازمان د بشري چارو همغږي کوونکي اولا موګرین پر دې بشري ضد جنایت ژوره خواشیني ښودلې ده.
اولاموګرين زیاته کړې ، چې د سپټمبر میاشتې له درېیمې نیټې راپدېخوا یو ځل بیا په راخین ایالت کې د مسلمانانو قتل عام پیل شوی دی.
د نوموړې په خبره په همدې موده کې د مسلمانانو تر ۱۰۰ ډېر کورونه سوځول شوي او په زرګونو خلک بې کوره شوي دي.
یاد سازمان دغه راز په خبرپاڼه کې پر میانمار غږ کړی ، څو باید د مسلمانانو پر وړاندې روان وحشت ودروي.
میانمار کې له کلونو راهيسې پر مسلمانانو ظلمونه پيل شوي، چې آن د نړۍ په کچه مسلمانانو پرې غبرګون ښودلی او یاد هېواد له حکومت نه یې غوښتي، څو هلته په مېشتو مسلمانانو ظلمونه ودروي.